சிறு பகுதியை நீக்கிய பின்பும் கிட்டத்தட்ட இயல்பாக செயல்படும் மூளை

தன்னால் மறு சீரமைத்துக் கொண்டு இயங்க முடியும் என்பதை ஒரு மூளை மீண்டும் நிரூபித்துள்ளது. மூளையின் அத்தகைய தன்மையை neuroplasticity என்று அழைக்கிறார்கள். புற்று நோயின் காரணமாக ஆறு வயது சிறுவன் ஒருவன் வலிப்பு வந்து பாதிக்கப்பட்டான். அந்த நோயை குணப்படுத்துவதற்காக சிறுவனின் வலது பக்க மூளையில் இருந்து ஒரு பகுதியை மருத்துவர்கள் நீக்கினார்கள். மூளையில் காட்சிகளை செயல்படுத்தும் பகுதியான occipital lobe மற்றும் ஒலியை செயல்படுத்தவும், காட்சியை பதிவு செய்யவும் மற்றும் மொழியை புரிந்துகொள்ள உதவும் பகுதியான posterior temporal lobe ஆகிய இரு பகுதிகளைத் தான் மருத்துவர்கள் நீக்கியிருந்தார்கள். 

(மூளை. பட உதவி: Pixabay)

அறுவை சிகிச்சை முடிந்து 13 மற்றும் 36 மாதங்கள் கழித்து அந்த சிறுவனின் மூளையை மருத்துவர்கள் பரிசோதனை செய்தனர். முகங்கள், காட்சிகள், பொருட்கள் மற்றும் சொற்களை அந்த சிறுவனுக்கு காட்டி, அவை மூளையில் எத்தகையை எதிர்வினையை, எந்தெந்த பகுதிகளில் ஏற்படுத்துகிறது என்பதை கவனித்தார்கள். fMRI வரைவி மூலம் செய்யப்பட்ட அந்த பரிசோதனையில், சிறுவனின் மூளை தானாக மறு சீரமைத்துக் கொண்டு செயல்படுவதை உறுதி செய்திருக்கிறார்கள்.

(மூளையின் பாகங்கள் - விக்கிமீடியா)

சிறுவனின் பத்தாவது வயதில் செய்யப்பட்ட பரிசோதனையில், அவனது நுண்ணறிவு எண் (IQ) சராசரியை விட அதிகமாக (118) இருந்தது. பொருட்களை அடையாளம் கண்டுகொள்ளும் திறனும், காட்சிகளை உணரும் திறனும் அந்த சிறுவனுக்கு அவனது வயதுக்கு ஏற்ற வகையில் இயல்பாக இருந்தது. இந்த பரிசோதனையின் முடிவுகள்,  நீக்கப்பட்ட வலது பக்க மூளையின் செயல்பாடுகளை இடது பக்க மூளை எடுத்துக்கொண்டு செயல்படுவதை குறிக்கின்றது. வலது பக்க மூளையின் பகுதிகள் நீக்கப்பட்டதால், அந்த சிறுவனால் இடது பக்க காட்சிகளை பார்க்க முடியவில்லை. இன்னும் இளம் பருவத்தில் இருப்பதால், மறு சீரமைத்துக் கொள்ளும் தன்மையைக் கொண்டு, அந்த சிறுவனின் மூளை மேலும் முன்னேற வாய்ப்பு இருக்கின்றது. மருத்துவர்கள், அந்த சிறுவனுக்கு மேற்கொண்டு பயற்சி அளித்து, சில ஆண்டுகளுக்கு பிறகு பரிசோதனை செய்து மேலும் புதிய முன்னேற்றங்களை கண்டுபிடிப்பார்கள் என்று நினைக்கின்றேன். 

இதைப் போன்ற ஆய்வு ஒன்றைப் பற்றி மருத்துவர் Norman Doidge தனது நூலில் (The Brain That Changes Itself) குறிப்பிட்டு இருக்கிறார். பிறந்த போதே மூளையின் இடது அரைக்கோளம் (hemisphere) இல்லாமல் பிறந்த மிச்சேல் மேக் பற்றி Doidge எழுதியிருக்கிறார். மிச்சேல் கருவாக இருந்த போது இடது பக்க மூளைக்கு செல்ல வேண்டிய ரத்தம் தடைப்பட்டதால், அவருடைய இடது பக்க மூளை வளராமல் போய் இருக்கலாம் என்று மருத்துவர் கூறுகிறார். இடது பக்க மூளை கவனிக்கும் பேச்சு, மொழி போன்ற செயல்களை அவரின் வலது பக்க மூளை செய்து கொண்டிருக்கிறது. வியக்க வைக்கும் ஞாபக ஆற்றலும், கணக்கிடும் திறனும் கொண்டிருக்கிறார் மிச்சேல். அந்த சிறுவனைப் போல், இவராலும் வலது பக்க காட்சிகளை பார்க்க முடியாது. ஆனால், மிச்சேலுக்கு மிகத் துள்ளியமாக கேட்கும் திறன் இருக்கிறது. மிச்சேலைப் பற்றியும், மூளை தொடர்பான மேலும் பல வியக்க வைக்கும் ஆய்வுகளைப் பற்றித் தெரிந்து கொள்ளவும் இந்த நூலை கட்டாயமாக படித்துப் பாருங்கள்.